Димаш Құдайберген «Diafa» жүлдесінің лауреаты атанды

Танымал қазақстандық әнші Димаш Құдайберген Дубайда өткен халықаралық DIAFA марапаттау рәсімінде «Өнерге қосқан үлесі үшін» жүлдесіне ие болды. Бұл туралы өнерпаз өз Instagram парақшасында бөлісіп, ұйымдастырушылар мен көрермендерге алғыс білдірді.

"DIAFA-ға өнерге қосқан үлес үшін берген сыйлыққа рахмет. Рахмет, Дубай, рахмет, DIAFA", — деп жазды Димаш. 

Distinctive International Arab Festivals Awards (DIAFA) — жыл сайын Дубайда өтетін беделді халықаралық марапат. Сыйлық мәдениет, өнер, бизнес және гуманитарлық салаға қосқан үлестері үшін түрлі елдердің көрнекті тұлғаларына табысталады. Лауреаттар халықаралық сахнадағы жетістіктері мен ықпалы негізінде таңдалады.

Естеріңізге сала кетейік, бұған дейін Қытайдағы Қазақстанның туризм жылының аяқталуына арналған халықаралық форумда Димаш Құдайберген «Киелі мекенім» әніне түсірілген жаңа бейнебаянын таныстырған еді.