Game of Drones: Қазақстандық стартап әлемдік гейминг нарығына қадам басты

Қазақстандық Game of Drones стартабы интернет арқылы нақты дрондарды қашықтан басқаруға мүмкіндік беретін бірегей киберспорттық онлайн-ойынды ұсынды. Бета-тестілеуге 23 елден 10 000 ойыншы қатысса, енді жоба жаңа деңгейге көтеріліп, Android платформасында ресми түрде іске қосылды.

Ойыншылар қашықтан дрондарды, танкілерді, роботтарды және радиобасқарылатын көліктерді басқара алады. Жарыстар арнайы трассаларда өтеді, ал бірінші тұлғадан түсірілетін видео шынайы рөлде отырғандай әсер береді.

Жоба идеясы 2017 жылы пайда болып, 2018 жылы Astana Hub инкубациялық бағдарламасына қабылданды. 2022 жылы 5G технологиясын тестілеу жобаның дамуына серпін беріп, сигналдың кідірісін азайту арқылы ойын үдерісін шынайырақ етті. 8 жылдық еңбектің нәтижесінде жоба енді жаһандық нарықты бағындыруға дайын.

Ойын индустриясы – әлемдік экономиканың маңызды драйвері. 2024 жылы ойын индустриясының табысы $187,7 млрд-қа жетіп, ойыншылар саны 3,4 млрд-ты құрады. Қазақстанның өз ойын студияларын дамытуы жаһандық нарықта бәсекеге қабілеттілігін арттыру үшін маңызды.

Game of Drones – тек ойын емес, ол қорғаныс саласына арналған симулятор ретінде де қарастырылады. Әскерилер қашықтан дрондарды басқаруды үйреніп, командалық жаттығулар өткізе алады.

2023 жылы жоба Defence Tech Battle байқауында «Қорғаныстағы революциялық шешім» номинациясын жеңіп алды. Сонымен қатар, Jas Ventures қорынан $100 мың инвестиция және Ғылым қорының $750 мың грантын иеленді.