Қазақстандық спортшы әлем кубогында күміс жүлдеге ие болды

Қазақстандық конькимен жүгіруден Арина Ильященко жасөспірімдер арасындағы әлем кубогының кезеңінде күміс медаль жеңіп алды. Жарыс Польшадағы Томашув-Мазовецк қаласында өтті.

Арина 500 метр қашықтықты 41.30 секундта жүгіріп өтіп, екінші орынға ие болды. Бірінші орынды 40.16 секундтық нәтижемен италиялық Джорджия Айело жеңіп алды. Қола жүлде неміс спортшысы Марлин Эхселунске бұйырды, оның көрсеткіші – 41.37 секунд.

Бұл Арина Ильященконың халықаралық жарыстардағы алғашқы ірі жеңісі емес. Бұған дейін ол әйелдер арасындағы әлем кубогында қола медаль жеңіп алған болатын.

Аринаның бұл жетістігі қазақстандық жас спортшылардың жоғары деңгейде өнер көрсетуге қабілетті екенін тағы бір рет дәлелдеді.