Супермиллиардерлер дәуірі: ең бай адамдардың жаңа санаты

1987 жылы Forbes алғаш рет миллиардерлер тізімін жариялады. Ол кезде әлемде 140 миллиардер болып, олардың жалпы байлығы 295 млрд долларды құраған. Ең бай адам ретінде жапондық жылжымайтын мүлік магнаты Есиаки Цуцуми танылып, оның дәулеті 20 млрд доллар деп бағаланды.

Қазіргі уақытта әлемдегі ең ауқатты адам – Илон Маск, оның байлығы 419,4 млрд доллар деп есептеледі. Бұл 1987 жылғы ең бай адамның байлығынан 21 есе көп. Соңғы жылдары әлемде миллиардерлер саны күрт өскендіктен, олардың арасында супермиллиардерлер деп аталатын жаңа категория пайда болды.

Бұл санатқа 50 млрд доллардан астам қаржысы бар адамдар кіреді. Бүгінде әлемде осындай 24 адам бар, олардың бірі – Илон Маск.