Шымбұлақ нұсқаушылары Түркі Мемлекеттерінің Алғашқы Кубогында топ жарды

18 ақпанда Өзбекстандағы Amirsoy Resort тау-шаңғы курортында әуесқойлар арасында Түркі Мемлекеттерінің Алғашқы Кубогы өтті. Бұл ерекше жарыс ортақ тарихи және мәдени құндылықтарды бөлісетін елдердің спортшылары мен қысқы спорт жанкүйерлерін біріктірді.

Турнирді 2024 жылы қыркүйекте Түркі Мемлекеттері Ұйымының (ТМҰ) қолдауымен құрылған Түркі мемлекеттерінің тау-шаңғы курорттары одағы ұйымдастырды. Бұл одаққа аймақтың жетекші курорттары – Әмірсой (Өзбекстан), Шахдаг (Әзербайжан), Шымбұлақ (Қазақстан) және Улудаг (Түркия) кіреді.

Қазақстандық Shymbulak Ski School нұсқаушылары алып слалом жарысына қатысып, жоғары деңгейдегі кәсіби шеберліктерін көрсетті.

Жеңімпаздар:

• Наталья Лапшина – 26-45 жас санаты, 1-орын
• Ксения Родионова – 18-25 жас санаты, 1-орын
• Артем Дементьев – 26-45 жас санаты, 2-орын

Түркі мемлекеттері арасындағы спорттық жарыстардың маңызы зор. Олар елдер арасындағы байланысты нығайтып, мәдени және тәжірибелік алмасуды дамытуға ықпал етеді. Қысқы спорт тек бәсеке ғана емес, сонымен қатар туризмді дамытатын, экономикалық өсімге әсер ететін және халықтар арасындағы ынтымақтастықты арттыратын құрал.