Тау бөктерінде көшкін қаупі сақталуда

Республикадағы тау бөктерлерінде қар көшкіні қаупі жоғары. Әсіресе Алматы облысындағы Іле Алатауы мен Шығыс Қазақстандағы Алтай таулары қатты зардап шегуі мүмкін.

Биыл 213 қар көшкіні тіркелді, олардың жалпы көлемі шамамен 1,2 млн м³ құрады. Ең қауіпті кезеңдер – қыстың басы мен көктемнің басы.

Туристер, шаңғышылар және альпинистер үшін негізгі қауіпсіздік ережелерін сақтау маңызды.

«Жыл басынан бері Қазселденқорғау ұйымы тұрғындар мен көлік жолдарын, сондай-ақ тау шаңғысы базаларын қорғау мақсатында 112 алдын ала көшкін түсіру жұмысын жүргізді. Жалпы көлемі 219 мың м³ қар түсірілді. Қауіпті кезеңдерде тұрғындар мен автокөліктердің көшкін қаупі бар аймақтарға кіруін шектеу үшін блок-бекеттер орнатылды. Қауіпті кезеңге дейін жергілікті атқарушы органдарға, тұрғын үй иелеріне және көшкін қаупі бар аймақтарда орналасқан ұйымдардың басшыларына тиісті тапсырмалар берілді», – деп мәлімдеді «Қазселденқорғау» мемлекеттік мекемесінің басшысы Ерболат Садырбаев.